Жылдар өтүп, күндөр санаа жаратып,

Бой жетип, айлар учуп санатып.

Апамдын жылуу колун сагынып,

Жете албадык, түйшүк-тоскоол жаралып.

Айылдан ысык жапкан нандарын,

Сагынып, эч бир жете албадым.

Түбөлүк жашасам да дүйнөдө,

Актаар бекем, аппак сүтүн апамдын.

Бой жетип, колдон чыгып, торолуп,

Жүрүп калдык кызмат-иш деп, созулуп.

Апам жүрөт күнү-түнү жол карап,

Сагынычын жүрөгүнө чогултуп.

Барганда, аппак жоолук салынып,

Тосуп алаар жолубуздан, сагынып.

Мээримин эч аябай уулунан,

Жалын берип жүрөк отун жаңыртып.

Если вы нашли ошибку, пожалуйста, выделите фрагмент текста и нажмите Ctrl+Enter.

Поделиться: